Lúxus einbýli í Mar Menor Golf Resort, Murcia

Á svæðinu er 18 holu golfvöllur hannaður af Jack Nicklaus. Fimm stjörnu Grand Luxury Intercontinental Hotel, íþróttamannvirki, matvöruverslun, barir, veitingastaðir, líkamsræktarstöð, spa o.fl. eru til staðar og svæðið er afgirt og með öryggisgæslu en tveir inngangar á svæðið eru búnir vaktmönnum allan sólarhringinn auk þess sem þeir fara um svæðið reglulega.

Húsið samanstendur af 5 svefnherbergjum og 3 herbergjum til viðbótar, sem nota má eftir þörfum (skrifstofa, svefnherbergi, þvottahús eða annað). Níu baðherbergi eru í húsinu, 56m2 eldhús og 218m2 stofa með háu lofti. Aðal svefnherbergið er 112m2 með einstakri inni- og útisundlaug og heitum potti en við húsið er einnig stór útisundlaug við stofuna þar sem finna má svæði til afslöppunar með útsýni yfir vatnið og golfvöllinn. Önnur 7 herbergi hússins hafa öll sér baðherbergi og eru milli 20 og 30m2 að stærð.

Húsið er staðsett á 2.567m2 einkalóð við rólega götu á svæðinu og aðeins nokkur skref eru að hótelinu og klúbbhúsinu. Eignin snýr í suðvestur og er því bjart og notalegt allan ársins hring.

Frágangur og efnisval eru í fremsta gæðaflokki og í takt við slíka lúxuseign. Að auki státar eignin af miðstöðvarkerfi, sjálfvirkum gluggahlerum, harðvið á gólfum, stórum arni, borðstofu fyrir 30 manns, öryggiskerfi með aðstöðu fyrir húsvörð og mörgu öðru.

Á lóðinni má nýta 620 m2 að auki, til byggingar á húsnæði í framhaldi af eigninni eða húsnæði fyrir gestkomandi eða þjónustu.